Dieđáhus 25.9.2018

 

SKÁBMAGOVAID ÁVVOJAHKI ČALMMUSTAHTTÁ ÁRKTALAŠ EAMIÁLBMOGIID FILMMAID 

Skábmagovat – eamiálbmogiid filbmafestivála lágiduvvo 21. geardde Anáris 24.-27.1.2019. Festivála váldotemán leat árktalaš eamiálbmogiid filmmat. Ávvojagi gudnin filbmabuvttadeaddji ja kuráhtor Sardana Savvina, gii lea Saha dásseválddis eret, čohkke Skábmagovaide filbmaprográmma Ruoššas buvttaduvvon eamiálbmogiid filmmain.

– Boahtte jagi mis leat máŋga buorre siva ávvudit go Skábmagovat deavdá 20 jagi ja arktalaš eamiálbmogiid ovttasbarggu lea nannosut go goassige ovdal, festivála dáiddalaš jođiheaddji Jorma Lehtola illuda ja joatká:

– Internašunála Sámi Filbmainstituhtta ásahan Árktalaš álgoálbmogiid filbmafoanda sihkkarasta, ahte filbmabuvttadeapmi šaddá ain gievrrabun árktalaš guovlluin.

Inuihtafilmmaid ofelaš, filbmabagadalli Zacharias Kunuk lea leamaš buvttadeamen vuosttaš haidagielat guhkes filmma, man namma lea Edge of the Knife (2018). Haida lea áitajuvvon giella, mas ledje 14 hálli jagis 2014. Internašunála Sámi Filbmainstituhtta lea álggahan fas ođđa rájálrasttideaddji filbmaprošeavtta, Arctic Chills, mii lea bálddonasmuitalusaid filbmaráidu.

Skábmagovat lea boarráseamos sámifilbmafestivála ja okta boarráseamos eamiálbmotfestiváliin. Ávvojagiin Skábmagovat háliida fállat ain viidásut kulturprográmma ja ávvudit árktalaš eamiálbmogiid ovttasbarggu ja gulahallama.

Skábmagovaid filbmaprográmmii sáhttá dieđihit filmmaid 10.11.2018 rádjai čujuhusas  http://skabmagovat.fi/skabmagovat_2014/?page_id=4288
Lassedieđut festiválaprográmmas: addá dáiddalaš jođiheaddji Jorma Lehtola tlf. 050 414 4349 / špoasta jorma.lehtola@skabmagovat.fi

 

SÁMEDÁIDAGA DOARJASEARVI RS ALMMUHA FESTIVÁLABUVTTADEADDJI BARGGU OHCANLÁHKAI

Sámedáidaga doarjjasearvi rs ohcá festiválabuvttadeaddji buvttadit Skábmagovat-filbmafestivála. Bargu álgá 15.10.2018 (dahje soahpamuša mielde) ja bistá 28.2.2019 rádjai.Buvttadeaddji bargun lea dikšut festiválabuvttadeapmái gulavaš áššiid dego filbmakopiijaid skáhppon, deaddiluvvon filbmaprográmmas fuolaheapmi ja siidodáhpáhusaid koordineren.

Barggu ohccis galgá leat nana eaŋgalsgiela dáidu ja hárjánupmi kulturbuvttadeami bargguin. Nuortalaš-, anáraš- dahje davvisámegiela dáiddus lea ávki barggus. Ohcamuš čuvvosiiguin galgá sáddet čujuhussii sunna.nousuniemi@skabmagovat.fi  maŋimusta 7.10.2018.

Lassedieđuid buvttadeaddji barggus addá doaibmajođiheaddji Sunna Nousuniemi tlf. 040 966 6318 /  špoasta sunna.nousuniemi@skabmagovat.fi

Print Friendly