Darlene Naponse lea Anishinaabe, Atikameksheng Anishnawbekis – Dávvi Ontarios. Son lea čálli, bagadalli ja video artista. Son lea rahkkadan njealjje guhkkes filmma ja manggaid oanehišfilmmaid. Naponse filbma Falls Around Her bálkkašuvvui Air Canada Audience Choice Award bálkkašumiin imagineNATIVE Film + Media Arts Festiválas jagis 2018.
Skábmagovain mii beassat oaidnit su filmma Stellar, mas neaktá blackfoot ja sápmelaš neakti Elle-Máijá Tailfeathers. Darlene Naponse oassálastá filmma čájáhussii ja olbmuin lea vejolašvuohta jearrat gažaldagaid čájáhusa maŋŋá.
