Skábmagovat lágida Ellos Eatnu – Ellos Duodji – Ellos Sápmi -beaivvi Sajosis, Anáris, 15.4.2023 dii 12.00-20.30.
Beaivvi áigge čájehuvvo ealligovaid golbma čájáhusas ja Sámi Duodji lágida mánáide ja nuoraide duodjebájiid.
Beaivvi nohká Ellos Eatnu -ealligova ovdačájáhussii, man maŋŋá neavttár Ella Marie Hætta Isaksen lea guossin. Ealligovva lea tekstejuvvon davvisámegillii ja suomagillii.
Doavttir Heidi Eriksen Sámi psykososiála ovttadat Uvjas lea maiddai mielde čájáhusa maŋŋá, jus šadda dárbu hállat ja gieđahallat dovdduid, mat sáhttet loktanit ealligovas.
Eará čájáhusain oidnet mánáidfilmma Mamma Mu davvisámegillii sihke oanehisfilmmaid: Unborn Biru (bagadalli: Inga Elin Marakatt), Áfruvvá (bagadalli Marja Helander) sihke Muohtačalmmit (bagadallit Hans Pieski & Arttu Nieminen).
Restoráŋŋa Čáiju lea rabas lávvardaga dii 12-17.
Ellos Eatnu – Ellos Duodji – Ellos Sápmi -beaivvi lágida Skábmagovat ovttas Sámi Dujiin, Sámedikki filbmaguovddaš Skábmain ja B-plan distributioniin.
Bileahtaid sáhtá oastit lávvardaga Sajosis ja ovddalgihtii neahttas lippu.fi bokte.
Aleksi Ahlakorpi
festiválahoavda, Skábmagovat
aleksi.ahlakorpi@skabmagovat.fi
