Muohtateáhter vuordá fas geahččiid! Pandemiija jaskkodahttin vilgesloavdagat eallájit fas, go EU:a áidna ja máilmmi davimus eamiálbmogiid jođihan filbmafestivála lágiduvvo 25. geardde. Vuordimis leat badjel 50 fiinna filmma, main oasi sáhttá geahččat maiddái neahtas.
Skábmagovat lea álggu rájes leamaš dihkkádeamen luotta eará eamiálbmogiid lusa. Ealligovva lea vuogas neavvu, mainna sáhttá nuppástuhttit olbmuid oainnuid eamiálbmogiid birra, muhto maiddái álbmogiid oainnuid iežaset birra. Juohke jagi ealligovvabearrašii servet ođđa gielat ja álbmogat. Dán jagi ealligovain hállet váldoálbmotgielaid lassin ee. aimara-, nakoda-, ojibwe- ja korébajügielaid.
Ávvojagi temán leat nana nissonat, nu bagadallin go váldopersovdnan. Prográmma guhkes filmmain čielga eanetlohku leat nissoniid bagadan, mii lea leamaš jo guhká mihtilmas ee. sápmelaš filmmaide. Elle-Máijá Tailfeathers, Danis Goulet ja Darlene Naponse Kanadas, Suvi West ja Liselotte Wajstedt Sámis ja Leah Purcell Austrálias leat buorit ovdamearkkat dan njunušjoavkkus, geaid Skábmagovat lokte dán jagi oidnosii – vajálduhtekeahttá oanehisfilmmaid dahkkiid (ja almmáiolbmuid). Prográmmas suokkardallet maiddái daid traumáhtalaš vásáhusaid, maid gálgama várás leat jo vuođđudan duohtavuohta- ja soabadankommišuvnnaid máŋgga riikkas Davviriikkain gitta Australia rádjái.
Lea vuot áigi giitit festivála doarjuid ja eaktodáhtolaččaid dáid dálvediiddaid ollašuhttimis ja sávvat guossiid lieggasit bures boahtimin Anárii!
Jorma Lehtola
dáiddalaš jođiheaddji
