Álgoálbmogiid gievrras nissonat leat váldofáddán 25. Skábmagovat-festiválas Anáris. Maiddái áigeguovdilis duohtavuođa- ja soabadankomišuvdnabargu lea oidnosis festiválaprográmmas.
Skábmagovat festiválii boahtá guossi gitta Aotearoas, Ođđa-Selánddas. Fidžilaš filbma- ja teahterbagadalli Nina Nawalowalo dokumeanta A Boy Called Piano čájehuvvo Anáris. Dat govvida mánnán Ođđa-Selánddii fárren samoalaš albmá garra eallima ja mo son lea ceavzán váttis vásáhusain.
Duohtavuođa- ja soabadankomišuvdnabargui laktasit vihtta earáge dokumeantta: Suvi Westa Eatnameamet – Min jaskes dáistaleapmi ja čiekŋudahtti čoaggáldat Sámi AssimiNation, Ritva Torikka Out of the Dark into the Light – Seavdnjadasas čuvgii, bagadallilegeanda Alanis Obomsawina Honour to Murray Sinclair ja dasto Ørjan Marakatt Bertelsena Eallin.
Kanadas boahta guossin bagadalli ja servvodataktivisti Darlene Naponse, gean filbma Stellar govvida guovtte olbmo deaivvadeami, go meteorihtta beaškkeha eatnamii. Filmma váldorollas lea blackfoot/sápmelaš Elle-Máijá Tailfeathers, gii čájáhallá maid Danis Gouleta bálkkašuvvon scifi-filmmas Nightraiders. Tailfeathers lea dan lassin bagadallan maid filmma Kimmapiyiipitssini: The Meaning of Empathy, mii muitala Kanada váttis opioidadilis.
Sámebagadalliin festiválas leat Suvi West ja Ritva Torikka lassin maiddái Liselotte Wajstedt ja Sunna Nousuniemi, geaid filmmat gieđahallet seksuálalaš illásteami sámeservvodagas.
Anstein Mikkelsen ja Harry Johansen leaba muitaleamin Šaamšiǩ – Mattarahkku gahppir dokumeantta birra, mii bálkkašuvvui diimmá
ávčča Toronto ImagineNATIVE-festiválas. Ritva Torikka ođđa dokumeanta Paavvâl Taannâl Tiina – “rocksä’mmlaž” muitala nuortalaš váikkuheaddji Tiina Sanila-Aikio birra.
Ørjan Marakatt Bertelsena Eallin lea liegga muitalus 90-jahkásaš sámenissonis ja su áibbašeamis go son dovdá, ahte son lea manahan oktavuođa kultuvrii ja lundui. Filbma muitala mo servvodat duolbmá árbevirolaš sámi vuoigatvuođaid ja mo duohtavuođa- ja soabadankomišuvdna figgá roggat boastuvuođaid oidnosii.
Nana nissonfábmu boahta ovdan maid áboriginálabagadalli Leah Purcella bálkkašuvvon fikšuvnnas Drover’s Wife: The Legend of Molly Johnson ja Shannon Kringa dokumeanttas Čáhci lea eallin – Standing Rock nissonat. Maŋit filmmas, mas lakotanissonat vuostálastet oljobohci, leamaš suopmelaččat oassebuvttadeadjjin. Nissonat leat mielde maiddá Jaskesmeara guovllu bagadallikollektivas, man oktasaš filmmas We Are Still Here dahkko hirbmat áigemátki.
Muohtateahteras beassat oaidnit eaea. Venetsia biennalas čájehuvvon Marja Helandera Áfruvvá ja maiddái Hans Pieski ja Arttu Niemisa Muohtačalmmit. Earenomaš čájáhusain lea maid árktalaš ballu, nugo Inga Elin Marakatt Unborn Biru filmmas, mii čájehuvvo dáid beivviid maddái Sundance-festiválas Amerihkas.
Álgoálbmogiid filbmafestivála Skábmagovat ordnejuvvo 25. geardde Anáris 26.–29.1.2023 ja neahtas 29.1.-6.2.2023. Dáhpáhusa ordne Sámi Dáidaga Doarjjasearvi ovttasbarggus Sámedikkiin, Sámemusea ja luondduguovddáš Siiddain, Sámi oahpahusguovddážiin, Yle Sámiin ja Internášunala Sámi Filbmainstituhtain.
