Mii čeavlájit ovdanbuktit Skábmagovat 2026 -plakáhta! Dat lea hábmejuvvon jagi 2026 temá mielde, mii lea girjás ráhkisvuohta.
Plakáhta lea hábmen 20-jahkásaš nuorra dáiddár Roope Portti, gii dál orru Helssegis. Son lea bajásšaddan Keväjärvis, muhto su bearaš lea Anárjogas eret.
Su visuála dáidda ohcala inspirašuvnna sihke olmmošvuođas, norpmain, maid mii ieža ráhkadit, ja vuollekultuvrrain.
Girjás ráhkisvuođa lassin, plakáhta inspirašuvdna vuođđuduvvá dasa mo binára gákti ja sohkabeliid rasttildeaddji identitehta ovdanbuktin deaivvadeaba. Portti festiválaplákahta čujuha jagi 1957 filmma, Mädchen in uniform, plakáhtadáidagii. Filmma ovddit veršuvdna lea dulkojuvvon leat okta vuosttaš lesba filmmain.
