Skábmagovat – eamiálbmogiid filbmafestivála buktá girjás ráhkisvuođa filbmašearpmaide Anárii ođđajagimánus
Skábmagovat-filbmafestivála lágiduvvo fas 22.–25. ođđajagimánu 2026 Anáris, Sámis. Jagi 2026 festiválatemá lea girjás ráhkisvuohta. Festivála ulbmilin lea dán temáin čalmmustahttit ráhkisvuođa máŋggaláganvuođa eamiálbmogiid vásáhusain: ráhkisvuođas eatnigillii ja eatnamii, servošii ja sohkabuolvvaide, girjás ráhkisvuođa valljivuhtii.
“Skábmagovat 2026 lea bovdehus midjiide buohkaide govahallat ráhkisvuođa – ii passiiva dahje álohii nu álkes áššin, muhto viidudeaddji vuoibmin. Dat bovde min áimmahuššat iežamet, guhtet guimmiidasamet ja min oktasaš birrasa”, govvida festivála dáiddalaš jođiheaddji Sunna Nousuniemi.
Nousuniemi joatká ovddeš dáiddalaš jođiheaddji, Jorma Lehtola, rollas. Lehtola lea leamaš hábmemin festivála badjel 30 jagi. Festivála leage sirdásan ođđa áigodahkii mearkkašahtti nuppástusain, muhto goittotge litnásit, go festivála rahpanbeaivvis čájehuvvo Lehtola kurateren filbmačájáhus Muittuid Anár. Dat čájehuvvo Sámemusea Siiddas dii. 19.30.
Festivála váldoguossi boahtá Kanadas
Festivála filbmaprográmma sisttisdoallá badjel 55 ealligova ja 25 vuosttašeahkeda miehtá máilmmi. Festivála váldoguossi Sinakson Trevor Solway boahtá Kanadas. Son lea gullevaš siksika-eamiálbmogii. Su guhkes dokumentára Siksikakowan: The Blackfoot Man gieđahallá eamiálbmot almmáiolbmuid sohkabealrollaid ja maskulinitehta. Filbma čájehuvvo Sámekulturguovddáš Sajosis bearjadaga 23. ođđajagimánu dii 16.00.
Festiválas leat maiddái oaidninláhkai sámi buvttadeamit vuosttašeahkedis, earret eará Ciao ráhkis! ja Heajastallan – A Sámi Wedding. Heajastallan lea sámi tv-dráma-ráidu, mii lea aiddo ilbman Norga bealde TV:as. Heajastallan čájehuvvo Skábmagovain bearjadaga dii 19.30. Ráiddu bagadalli-giehtačálli Åse Kathrin Vuolab searvá čájáhussii filbmaguossin. Ciao ráhkis! -tv-ráidui vuođđuduvvi guhkesfilbma fas oažžu máilmmi vuosttašeahkeda Sajosis lávvardaga dii 14.30. Čájáhussii servet earret eará bagadalli Ken Are Bongo ja filmma okta váldoneavttáriin, Sissi Jomppanen.
Dasa lassin Skábmagovat lágida filbmačájáhusa, man ulbmilin lea čájehit solidaritehta palestiinnálaččaid olmmošvuoigatvuođaid bealis. Čájáhusas lea oaidninláhkai palestiinnálaš bagadalli Areeb Zuaitera guhkes dokumentára Yalla Parkour. Filbma lea empahtalaš govvádus nuorain, geat niegadit earálágan duohtavuođain hárjehaladettiin parkoura Gaza bieđggus eanadagain.
SkábmaKlubba fállá fas geasuheaddji eahketprográmma
Skábmagovaid siidoprográmmas lea earret eará Girjás ráhkisvuohta – panelaságastallan, mii čohkke eamiálbmot filbmadahkkiid ja dáiddáriid guorahallat fáttá. Ságastallan lágiduvvo Sámekulturguovddáš Sajosis bearjadaga dii 14.00. Lávvardaga fas lágiduvvo Filbmadahkkit guovddážis – ságastallan Sámemusea Siiddas dii 10.30. Goabbáge dilálašvuohta lea rabas buohkaide.
Festivála ordne maiddái SkábmaKlubba sihke bearjadaga ja lávvardaga Sámekulturguovddáš Sajosis. Bearjadaga klubbas loaiddasta AJR – Aanaar Jazz Revival ovttas Jezebroin ja Amociin, loahppaeahkedis joatká smáđáhkes DJ HulluElla. Lávvardaga ovdafeasta álgá Muohtateáhteris, gos DJ Petra Laiti šuoŋaidisguin bovde olbmuid ráhkadit stuimmi dánsunláhttái. Eahket joatkašuvvá SkábmaKlubbas, gos loaiddasta Sámi ođđa, šerres násti, neavttár ja lávlu VEGARD, gean maŋŋá DJ Petra Laiti guoimmuha feastta gitta idjii.
Bileahtavuovdin ja festiválasáhttu
Festivála bileahtavuovdin lea jođus lippu.fi-neahttasiidduin. Skábmagovat lágida oktasaš sáhtu festiválii ovttasbarggus Anára kulturdoaimmain. Sáhttu lágiduvvo lávvardaga 24.1.2025 Suoločielggis Avvila bokte Anárii ja ruovttoluotta. Lassedieđuid áigetávvaliin sáhttá lohkat festivála neahttasiidduin.
Skábmagovat – eamiálbmogiid filbmafestivála prográmma lea almmuhuvvon golmma gillii: davvisámegillii, suomagillii ja eaŋgalsgillii. Festivála birra oanehaččat
Skábmagovat bovde buohkaid čiekŋut eamiálbmogiid muitalusaide ja geahčastagaide. Festivála ulbmilin ovdanbuktit eamiálbmogiid filbmadáidaga sihke báikkálaš ja internationála gehččiide ja ovdánahttit kultuvrraidgaskasaš gulahallama ja áddejumi.
