[Aanaar, Säämi, 5. juovlamánu 2024 ] – Skábmagovat – eamiálbmogiid filbmafestivála lea almmustahttán jagi 2025 festiválaplakáhta, mii rahpá ođđa festiválabáji ja buktá movtta aiddo álgán skábmaáigái. Plakáhta lea ráhkadan dáiddár Lada Suomenrinne, guhte lea Deatnoleagis eret. Plakáhta visuála temá vuođđuduvvá jurdagii čuovgga guvlui. Plakáhta lea dáiddára iešgovva, mas son lea coggan su gieskat vádjolan áddjárohki gávtti.
“Iežan govvadáidagis dávja guorahalan iešguđetlágan rádjádiliid ja mo dat deivet oktii. Plakáhta ráhkadettiin jurddašin utopisttalaš čuvgesruokses silkebalvva, iežan persovnnalaš ovdaneami olmmožin ja mo dat lea johttit čuovgga guvlui?” govvida Suomenrinne iežas dáiddalaš bargovuogi.
Skábmagovain lea vejolaš maiddái oaidnit Suomenrinne dáidaga filmma hámis: Muohtateáhtera rahpandoaluin čájehuvvo oanehisfilbma Biegga bieggá, man Suomenrinne ja Anárjohkii gullevaš dáiddár Jenni Laiti leaba ráhkadan ovttas.
Nuppástusat kultursuorggis ja idjadansajiid kapasitehtas
Suoma beale kultursuorggis lea dál nuppástusaid áiggi, masa sivvan lea go ráđđehus lea čuohppan kultursuorgi ruhtadeami. Dát dilli vuhtto maiddái Skábmagovaid boahttevaš doaimmain ovdamearka dan láhkai, ahte online-festivála ii ordnejuvvo boahtte jagi.
“Kultursuorggi ruhtadeami čuohppamat leat hástalan festiválaorganisašuvnna guorahallat dáhpáhusa boahttevuođa ja guđe guvlui ovdánahttit dan. Muhto das fuolatkeahttá, min ulbmilin lea ain fállat filbmaberošteaddjiide áidnalunddot vásáhusa, mii čatná oktii olbmuid ja kultuvrra”, lohká prográmmakoordináhtor Sunna Nousuniemi.
Festiválaorganisašuvdna ávžžuha maiddái festiválagalledeaddjiid ráhkkanit dasa, ahte boahtte jagi idjadansajiid fálaldat lea unnit go ovdal. Idjadansajiin lea gárži ja eanáš oassi dain lea juo várrejuvvon. Mii ávžžuhit, ahte festiválagalledeaddjit ohcet idjadansaji ja váldet vuhtii molssaevttolaš idjadeami dego unnit hoteallaid, guosseviesuid, stobuid dahje priváhta idjadeami.
Skábmagovat – kultuvra buohkaide
Skábmagovat bovde buot filbmaráhkisteaddjiid návddašit festivála fálaldagas ja váldit alcceset áiggi čiekŋut eamiálbmogiid muitalusaid máilbmái. Festivála buktá oktii filbmadahkkiid miehtá máilmmi ja fálla galledeaddjiide erenoamáš vejolašvuođa vásihit ođđa, áidnalunddot filmmaid ja ovdanbuktimiid, mat ovddit kultuvrraid gaskasaš gulahallama ja ovttasbarggu.
Festivála lágida Sámedáidaga doarjjasearvi rs, ja ovttasbargoguoimmit leat Arctic Indigenous Film Fund, Embassy of Canada in Helsinki, Filbmaguovddáš Skábma, Anára gieldda kulturdoaibma, Internašunála Sámi Filbmainstituhtta, Sámi film industry and media education Erasmus+ prošeakta, Sámi oahpahusguovddáš, Sámekulturguovddáš Sajos, Sámemusea Siida ja U.S. Embassy in Finland.
Jagi 2025 buvttadanbargojovkui gullet buvttadeaddji Taru Arrela, veahkkebuvttadeaddji Tiina Aikio, Filbmaguovddáš Skábma plánejeaddji Tarja Porsanger, dáiddalaš jođiheaddji Jorma Lehtola ja prográmmakoordináhtor Sunna Nousuniemi.
Skábmagovat lágiduvvo 23.-26. ođđajagimánu 2025. Festivála álgá árbevieru mielde Muohtateáhtera rahpandoaluin duorastaga 23.1. dii 18.00 – liekkus buresboahtin!
Akkrediteren festiválii nohká 15. ođđajagimánu 2025.
Lassedieđut:
Skábmagovat – eamiálbmogiid filbmafestivála
Telefovnna: +358 40 173 7150
Epoasta: info@skabmagovat.fi
Neahttasiiddut: https://skabmagovat.fi/
Sosiaalinen media: Instagram @skabmagovat, Facebook Skábmagovat Film
Festival
Mediaoktavuohta:
Radio-JusSunná / Sunna Nousuniemi
Prográmmakoordináhtor
+358 40 7190758
sunna.nousuniemi@skabmagovat.fi
