Aanaar, Säämi, 13. ođđajagimánu 2025 — Skábmagovat eamiálbmogiid filbmafestivála lea
almmustahttán jagi 2025 filbmaprográmma ja rahpan bileahtavuovdima. Prográmma gávdno
festivála neahttasiidduin sihke suoma- ja eŋgelasgillii. Prográmma almmustahtto anárašgillii dán
vahkkus. Prográmma sisttisdoallá badjel 70 filmma ja 47 iešguđetlágan vuosttašeahkeda. Filmmat
guorahallet dehálaš fáttáid dego eallima girjáivuođa suodjaleami, eamiálbmogiid dieđu,
sátnefriijavuođa, identitehtaid máŋggabealatvuođa ja searvvušlaš áimmahuššama.
“Eamiálbmogiid filbma eallá nannosit. Buorre ovdamearkka lea, ahte sámi guhkes filmmat leat
šaddan fásta, jahkásaš ja máilmmiviidosaš fenomenan. Ođđa filmmat dego Egil Pedersena Biru
Unjárga oaččui máilmmi vuosttašeahkeda Torontos, ja Netflixa vuosttaš sámi filbma Stolen, man
lea bagadallan Elle Márjá Eira, lea čoaggán miljovnnaid gehččiid. Guktot filmmat leat
Skábmagovaid prográmmas”, muitala festivála dáiddalaš jođiheaddji Jorma Lehtola.
FILBMAPROGRÁMMA TIPSAT
Rahpan – Lekkâmeh: Festivála vuolgá johtui árbevieru mielde Muohtateáhtera rahpandoaluin
Sámemusea Siidda olgomuseas, gos čájehuvvojit eamiálbmogiid oanehisfilmmat Sámis ja miehtá
máilmmi. Dilálašvuohta lea nuvttá, heivvolaš mánnábearrašiidda – ja dresscode lea gárvodit
gerddiiguin.
Árktalaš duođaštušat – Arktâsiih tuođaštusah filbmačájáhus máilmmi vuosttašeahkedis:
Witness 2024 – oanehisfilbmaráidu ovdanbuktá Árktalaš guovllu filbmadahkkiid duođaštusaid das
mo dálkkadatrievdan čuohcá sin eallimii ja servošiidda. Filbmadahkkit servet čájáhussii muitalit
dain fáttáin.
Uhkiduvvon sátnefriijavuohta – Uhkedum sänirijjävuotâfilbmačájáhus:
Bad Press bálkkašuvvui Sundance-festiválas Sátnefriijavuođa bálkkašumi, ja dál filbma čájehuvvo
Anáris nuvttá, ovttasbarggus Ovttastuvvan stáhtaid ambassádain. Journalista, filbma
váldokarakteara Angel Ellis boahtá muitalit iežan barggus sátnefriijavuođa ja eamiálbmogiid
representašuvnna dáfus.
Sámi oainnut – Sämmiliih uáinuh -filbmačájáhus: Ođđaseamos sámi oanehisfilmmat
čájehuvvojit oahpes vieru mielde lávvardaga Sámi kulturguovddáš Sajosis. Oaidninláhkái lea
máŋggabealat fálaldat vuosttašeahkediid, mat sisttisdoallá dokumentára, fikšuvdna- ja
eksperimentála filmmaid Sámi filbmadahkkiid ođđa buolvvas.
SIIDOPROGRÁMMA TIPSAT
Ságastallandilálašvuođat: Filbmačájáhusaid lassin Skábmagovat lágida ovttasbarggus Arctic
Film Fundain ja Internašunála Sámi Filbmainstituhtain ságastallandilálašvuođaid filbmadahkkiiguin
ja eará filbma- ja mediasuorggi ámmátolbmuiguin bearjadaga 24. ođđajagimánu ja lávvardaga 25. ođđajagimánu. Dilálašvuođat leat buohkaide rabas ja nuvttá.
- Sámi Filmmat Boađi Boađi: Filbmadahkkit Elle Sofe Sara ja Suvi West searvaba muitalit
iežaska boahttevaš guhkes filmmaid birra ja makkár bargovugiiguin soai ráhkadeaba
muitalusaid. Moderáhtor: Siljá Somby (ISFI filbmakonsuleanta). - Árktalaš filbmabuvttadeamit ja skuvlejupmi rájáid rastá: Filbma- ja mediasuorggi
áššedovdit čoahkkanit ságastallat eamiálbmogiid mediabuvttademiid ja skuvlenfidnuid birra,
ja makkár vejolašvuođaid dat buktet Árktalaš guovllus. Moderáhtor: Liisa Holmberg (AIFF
filbmakonsuleanta). - Angel Ellis & Eamiálbmogiid muitalanárbevierru: Muscogee-journalista Angel Ellisa
čehppodahkii gullá oahpahit ehtalaš ođasáššiid čoaggima ja searvvušlaš oktavuođaid
huksema ja seammás doarjut eamiálbmogiid muitalanárbevieru. Dáid temáid vuođul Ellis
lágida bargobáji festiválas.
SkábmaKlubba: SkábmaKlubba oktavuođas ordnejuvvo máŋga iešguđetlágan dilálašvuođa. Bearjadaga lágiduvvo SkábmaChills, ráfálut DJ-performanssa ASAP – As Slow As Possible, mas
Radio-JusSunná čuojaha litná šuoŋaid iešguđetlágan ritmmain. Lávvardaga klubba-eahket
rahpasa áidnalunddot ovdafeasttain Muohtateáhteris, gos DJ HulluElla elektrovnnalaš
dánsunmusihkka ja gievra bass-lines ovttastahttá house- ja teknomusihkka. Nappo geasa
goikkehiid juolgái ja ráhkkan dánsut nástealmmi vuolde! Eahkeda suohtastallamat bistet gitta idjii
SkábmaKlubbas Sajosis, gos beassá návddašit iešguđetge artisttaid musihkas.
BILEAHTAVUOVDIN
Festivála bileahtavuovdin lea álgán tiketti.fi-neahttasiiddus. Festivála ordne maiddái ovttasbarggus
Anára gieldda kulturdoaimmain oktasaš sáhtuid lávvardaga 25.1. Suoločielggi ja Avvila bokte Anárii
ja ruovttoluotta. Lassedieđut Skábmagovaid neahttasiidduin.
OANEHAČČAT FESTIVÁLA BIRRA
Skábmagovat bovde buot filbmaráhkisteaddjiid návddašit festivála fálaldagas ja váldit alcceset áiggi čiekŋut eamiálbmogiid muitalusaid máilbmái. Festivála ulbmil lea ovdanbuktit eamiálbmogiid
muitalusaid, geahččanguovlluid ja hutkás ovdanbuktimiid sihke báikkálaš ja internašunála
gehččiide, ja dainna lágiin ovddidit kultuvrraid gaskasaš dialoga ja áddejumi. Festivála lágiduvvo
23.-26. ođđajagimánu Anáris, Sámis.
Lassedieđut, jearahallanbivdagat ja media-akkrediteren:
Skábmagovat eamiálbmogiid filbmafestivála
Telefovdna: +358 40 1911621
Epoasta: info@skabmagovat.fi
Neahttasiiddut: https://skabmagovat.fi/
Sosiala media: Instagram @skabmagovat, Facebook Skábmagovat Film Festival
