Tuäivtam tiʹjjid pukid vieʹsslõs miõlin Aanra vuässõõttâd õõut skammääiʹj jäänmõsân miârkteei
šõddmõʹšše. Skammkaart lie maaiʹlm tââʹvmõs alggmeerai jieʹllikarttfestivaal, koon
jäʹrjstet juõʹǩǩ eeʹjj ođđeeʹjjmannu looppâst nuʹtt 320 ǩilomettred polarkruuggâst tââvas.
Oʹdinaknallšem aarktlaž Aanar taʹrjjad teʹl pueʹrmõõzzâs muõttjest rajjum ålggäimmteatteeʹr ââʹlm
vueʹlnn puõccutuõʹllji âʹlnn išttâd åårrai meeraikõskksaž ǩiõččjid.
Festivaal lij šõddâm säʹmmlai da jeeʹres alggmeerai jieʹllikarttpuuʹtʼtõõzz
kaaunõõttâmsââʹjjen Skammkaart tuejjee fiin naaʹlin kuâsttjeeʹjen alggmeerai maaiʹlm da
äʹrbbvuõđ. Tõn lââʹssen aanarneeʹǩǩ vuäiʹtte festivaal raami seʹst kuärǥast kåččad kuõʹssid Lääʹddjânnmest da
pirr maaiʹlm tobdstõõttâd meeraikõskksaž da määŋgkulttuurlaž dommkåddseez.
Sääʹmkulttuur puk tääʹrǩmõs toiʹmmjeei lie nuʹtt ǩilomettar seʹst festivaalpääiʹǩest.
Vuuʹdest toiʹmmje Sääʹmteʹǧǧ, sääʹm-museo, sääʹmkulttuurkõõskõs, Sääʹm škooultemkõõskõs,
sääʹmarkiiv, Yle Sääʹmm di määŋg jeeʹres sääʹmorganisaatio da
-õhttõõzz. Täin pukin lij jõnn miârktõs Aanar kådda da kåʹddniiʹǩǩid jm.
teâđ juõʹǩǩjen, reâugguʹvddjen da âsttääiʹj vieʹttjempäiʹǩǩen. Tõʹst späʹsseb Aanar ceerkavsiid aktiivlaž
toiʹmmjeeʹjid, kook tuärjjee toiʹmmjummšiʹnez kådda tääʹrǩes pueʹttiääiʹj teeʹmid, kook lie
ouddmiârkkân kååʹdd jieʹllemvueʹǩǩrajjâz da põõrǥâstoiʹmmjummuž määŋgpeällsubun tuejjummuš, sääʹmkulttuur
da sääʹmǩiõl ânnʼjõõžž ravvsab sââʹjj, puki kåʹddniiʹǩǩi pueʹrrvââjjmõš da
leklvažvuõtt di ouddmiârkkân puõccuvueʹǯǯ, kueʹl da muõr valmštemtääʹzz lââʹzztummuš.
Skammkaart-festivaal lij še juõʹǩǩekksaž kulttuuršõddmõš Aanar nuõrid da päärnaid.
Tõn lââʹssen, što Aanar ceerkavsiid škooulneeʹǩǩ vuässâʹtte škooulneǩčuäjtõõzzid, lie sij määŋg
eeʹjj tuejjääm festivaal paaldâst čõõđtum mediapaaʹjin vuäʹnkõsfiilmid festivaalid.
Sääʹm škooultemkõõskõõzz mediamäättai pääiʹǩ lie puättam looʹjji mieʹldd ođđ
mediasueʹrj siltteei. Skammkaart-festivaal taʹrjjad veiddsõs ǩiõččji meäʹr mättʼtõõttji tuâjaid. Lââʹssen Sääʹm škooultemkõõskõõzz
mediamättʼtõõtti lie mieʹldd šõddmõõžž teeknlaž čõõđ viikkmest.
Pueʹtted tiõrvân Aanra seuʹrrjed fiin festivaalprograamm. Tõt tuejjad kuâsttjeeʹjen alggmeerai
maaiʹlm da maainâsäʹrbbvuõđid. Hääʹsǩes jieʹllikarttǩiõččlâsttmõõžž!
Tommi Kasurinen
Kåʹddjååʹđteei
Aanar kåʹdd
