Mun tuáivuttâm tii puohâid ilolijn mieláin Anarân uásálistiđ oovtâ skammâääigi merhâšitteemus
tábáhtusâin. Skammâkoveh lii maailm tavemus algâaalmugij elleekovefestivaal, mii
uárnejuvvoo ihásávt uđđâivemáánu loopâbeln suulân 320 kilomeetter näpikiärdust tavas.
Áinoošlajâsâš arktâlâš Aanaar fáálá-uv talle puoh pyeremuid pelijdis muottust rahtum olgoáimuteatter alme
vyelni poccuutuoljijn čokkájeijee almugijkoskâsâš aalmugân.
Festivaal lii šoddâm sämmilij já eres algâaalmugij elleekovepyevtittem
teivâdemsaijeen. Skammâkoveh taha-uv algâaalmugij maailm já ärbivyevi uáinulâžžân fiijnâ
vuovvijn. Ton lasseen aanaarliih pyehtih festivaal ooleest povdiđ čiävlán kuosijd Suomâst já
pirrâ maailm uápásmiđ almugijkoskâsâš já maaŋgâkulttuurlâš päikkikieldâsis.
Puoh sämikulttuur kuávdášliih tuáimeeh láá suullân kilomeetter keččin festivaalsaajeest.
Kuávlust tuáimih Sämitigge, Säämimuseo, Sämikulttuurkuávdáš, Säämi máttááttâskuávdáš,
Sämiarkkâdâh, Yle Säämi, sehe maŋgâ eres sämiorganisaatio já
-seervih. Tain lii puohâin stuorrâ merhâšume oles Aanaar kieldân já kieldâláid ei.
tiätujyehhen, pargoadeleijen já astoäigisaijeen. Tast kijttoseh Aanaar markkân aktiivláid
tuáimeid, kiäh tuárjuh toimâidiskuin kieldân tehálijd puátteevuođâ teemaid, moh láá
ovdâmerkkân kieldâ iäláttâsráhtus já irâttâstoimâm maaŋgâpiälálistume, sämikulttuur
já sämikielâ tááláá nanosub sajadâh, puoh kieldâlij pyereestvaijeem já luholâšvuotâ sehe
ovdâmerkkân poccuupiärgu, kyele já muorâ jáludemtääsi aledem.
Skammâkoveh-festivaal lii meiddei jyehi-ivvááš kulttuurtábáhtus aanaarláid nuoráid já párnáid.
Ton lasseen, ete Aanaar markkân škovlâliih uásálisteh škovlâlâščáittusáid, sij láá maaŋgâ
ive ráhtám festivaal ooleest olášuttum mediapáájáin uánihisfiilmâid festivaalân.
Säämi máttááttâskuávdáá mediauápui peht láá šoddâm maŋgâlov uđđâ mediasyergi
mättee. Skammâkoveh fáálá valjeest keččeid uáppeetuojijd. Lasseen Säämi
máttááttâskuávdáá mediauáppeeh láá mield tábáhtus teknisii olášutmist.
Tiervâpuáttim Anarân čuávvuđ fiijnâ festivaalohjelm. Tot taha algâaalmugij
maailm já muštâlusärbivuovijd uáinulâžžân. Suotâs elleekovepuudah!
Tommi Kasurinen
Kieldâhovdâ
Aanaar kieldâ
